SHKOLLA E MUZIKËS “MIRELA” NË PODUJEVË

Një vizion përtej leksioneve muzikore

E themeluar dhe drejtuar nga Ymer Musa, Shkolla e Muzikës “Mirela” është më shumë se sa një qendër e kurseve muzikore. Musa, një muzikant dhe kitarist me përvojë të gjatë në Maqedoni të Veriut dhe Shqipëri, e themeloi këtë shkollë në korrik të vitit 2012. Motivimi kryesor për këtë ishte plotësimi i boshllëkut ekzistues nga mungesa e një shkolle të muzikës në Podujevë. Vizioni i tij shkon përtej mësimdhënies së thjeshtë të muzikës, pasi që qëllimi është krijimi i një mjedisi mbështetës ku fëmijët e Podujevës mund të zhvillojnë dhe kultivojnë talentet e tyre muzikore.