Rishtas, rreth njëzet të rinj nga Mitrovica e Veriut dhe e Jugut u mblodhën në Kodrën e Minatorëve në Mitrovicën e Veriut për të marrë pjesë në një aktivitet rinor të fokusuar në shëndetin mendor dhe mirëqenien. Ngjarja u organizua nga Community Building Mitrovica (CBM) si pjesë e projektit “Nxitja e Bashkëpunimit Ndër-etnik dhe Angazhimit Qytetar të të Rinjve”, i cili i inkurajon të rinjtë që t’i diskutojnë sfidat e përbashkëta dhe të punojnë së bashku për zgjidhje. Ulur mbi dyshekë për joga dhe duke punuar në çifte, pjesëmarrësit ushtruan teknika frymëmarrjeje që mund t’i ndihmojnë të përballen me stresin dhe ankthin. Aktiviteti synonte të promovonte mirëqenien mendore duke krijuar një hapësirë ku të rinjtë mund të takohen, të komunikojnë dhe të mësojnë nga njëri-tjetri.
Identifikimi i sfidave së bashku
Marina Jakovljeviq, koordinatore e projektit “Nxitja e Bashkëpunimit Ndër‑etnik dhe Angazhimit Qytetar të të Rinjve”, i zbatuar nga Community Building Mitrovica (CBM), shpjegoi se aktiviteti është pjesë e një procesi më të gjerë në të cilin të rinjtë identifikojnë sfidat në jetën e tyre dhe punojnë së bashku për t’i adresuar ato. “Të rinjtë morën pjesë në një aktivitet të fokusuar në promovimin e shëndetit mendor. Ata ushtruan teknika frymëmarrjeje si një metodë parandaluese që mund t’i ndihmojë t’i rregullojnë emocionet kur ndihen të shqetësuar ose nën stres,” tha Jakovljeviq. “Kjo është vetëm një nga shumë aktivitetet që po organizojmë bazuar në çështjet që të rinjtë nga të gjitha etnitë i kanë identifikuar. Mes tyre, shëndeti mendor është theksuar si një nga më të rëndësishmit.” Ajo shtoi se hapi i radhës do të përfshijë diskutime me vendimmarrësit për të eksploruar mënyrat se si të shfrytëzohen burimet ekzistuese për të mbështetur dhe përmirësuar shëndetin mendor tek të rinjtë. “Porosia për të rinjtë është të punojnë me veten, të ndikojnë në rrethin e tyre dhe të krijojnë shoqërinë në të cilën duan të jetojnë,” përfundoi Jakovljeviq.
Ndërtimi i urave të mirëkuptimit
Kastriot Krasniqi, anëtar i Community Building Mitrovica, tha se aktivitete të tilla krijojnë hapësirë që të rinjtë nga etni të ndryshme të takohen, të komunikojnë dhe të mësojnë nga njëri‑tjetri. “Aktiviteti ynë synon të bashkojë të rinj me prejardhje të ndryshme për të ndërtuar ura mirëkuptimi dhe për të promovuar shëndetin mendor si një vlerë të përbashkët”, tha Krasniqi. “Përmes dialogut të hapur dhe respektit të ndërsjellë, ne krijojmë hapësira të sigurta ku çdo zë mund të dëgjohet dhe vlerësohet”.
Blerona Sylaj, asistente e projektit në National Endowment for Democracy (Fondi Kombëtar për Demokraci – NED), tha se aktiviteti ishte përqendruar në përmirësimin e mirëqenies mendore, duke inkurajuar njëkohësisht komunikimin mes të rinjve nga etni të ndryshme. “Ky aktivitet krijon mundësi që të rinjtë të kuptojnë më mirë kulturat dhe perspektivat e njëri‑tjetrit”, tha Sylaj. “Përmes aktiviteteve të përbashkëta dhe dialogut konstruktiv, ne i forcojmë lidhjet mes të rinjve dhe promovojmë një kulturë paqeje, respekti dhe mirëqenieje”.
Mësimi i teknikave për të menaxhuar stresin
Seanca praktike u udhëhoq nga instruktorja e jogës, Damira Bahadir, e cila i ka katërmbëdhjetë vjet përvojë. Ajo punoi me pjesëmarrësit mbi teknikat e frymëmarrjes dhe shpjegoi se si ato mund të përdoren në situata të përditshme stresuese. “Teknikat e frymëmarrjes mund të ndihmojnë ndjeshëm në rregullimin e stresit dhe situatave stresuese në jetën e përditshme”, tha Bahadir. “Porosia ime për të rinjtë është e thjeshtë: merrni frymë thellë dhe gjërat do të bëhen më të lehta”.
Zërat e të rinjve ndajnë një përvojë të përbashkët
Pjesëmarrësit i ndanë edhe përshtypjet e tyre për aktivitetin. Adea Tahiri (20), nga Mitrovica e Jugut, tha se takimi u fokusua në mësimin e teknikave të frymëmarrjes dhe diskutimin së bashku për shëndetin mendor. “Të rinjtë serbë dhe shqiptarë janë këtu bashkë duke mësuar teknika frymëmarrjeje. Këto aktivitete na ndihmojnë të ndërtojmë miqësi dhe të lidhemi me njëri‑tjetrin”, tha Tahiri. “E njohim të kaluarën dhe ndikimin e saj, por me kalimin e kohës rrethanat kanë ndryshuar. Sot ndihemi rehat duke komunikuar me njëri‑tjetrin, duke kaluar kohë së bashku dhe duke marrë pjesë në aktivitete së bashku”.
Nikolina Jovanoviq (19), nga Mitrovica e Veriut, tha se ngjarja mblodhi së bashku të rinj nga prejardhje të ndryshme për të hapur një dialog mbi shëndetin mendor. “Qëllimi është të tregojmë se sfidat me të cilat përballen të rinjtë janë universale”, tha Jovanoviq. “Përmes bisedës dhe bashkëpunimit, duam të ndërtojmë besim, mirëkuptim dhe mbështetje të ndërsjellë”.
Aktiviteti e pasoi një diskutim të mëhershëm në tryezë të rrumbullakët me psikologë, i cili mblodhi së bashku të rinj nga të dyja pjesët e Mitrovicës për të diskutuar hapur sfidat e shëndetit mendor. Diskutimi ndihmoi në mbledhjen e ideve për një fushatë avokuese të udhëhequr nga të rinjtë, pasi pjesëmarrësit e identifikuan shëndetin mendor si një nga çështjet kryesore që ndikon në mirëqenien e tyre.
