Të gjithë ne kemi hasur në situata të tilla kur kemi pasur vështirësi që ta kuptojmë shkrimin me dorë të dikujt tjetër. Kjo mbase ka çuar në dhënien e “komplimenteve” të tilla si: “Paske shkruar me këmbë!” Mirëpo, kureshtja jonë për shkrimin e dikujt tjetër (apo edhe shkrimin tonë) përfundon aty. Sidoqoftë, sipas ekspertëve, shkrimi ynë është po aq unik dhe tregues sa edhe ADN-ja apo shenjat tona të gishtërinjve.
Duke e analizuar shkrimin me dorë të dikujt, ne mund të nxjerrim informata të çmuara për atë se çfarë personaliteti është ai dhe cilat janë tendencat e tij/saj. për këtë arsye Grafologjia – ose shkenca për shkrimin e dorës, është duke u zhvilluar gjithnjë e më shumë dhe psikologët po bazohen gjithnjë e më shumë në të, në përpjekje për të konstatuar të gjitha karakteristikat psikologjike të individëve. Në vijim mund t’i lexoni disa prej treguesve që përdoren për të përcaktuar tipin e një personaliteti dhe ta konstatoni nëse këto konstatime vlejnë edhe për ju.
Në cilën anë i anoni shkronjat tuaja?
DJATHTAS: Jeni person shumë ekstrovert që kënaqet kur është i rrethuar nga një numër i madh njerëzish.
MAJTAS: Ju pëlqen më shumë që të punoni vetëm dhe të jeni “personi në prapavijë”.
DREJT: Udhëhiqeni nga logjika dhe jeni shumë praktik.
Madhësia e shkronjave
SHKRONJAT E MËDHA: Shumë personalitete të njohura i parapëlqejnë shkronjat e mëdha. Kjo do të thotë që jeni shumë të shoqërueshëm dhe që ju pëlqen që të jeni në qendër të vëmendjes.
SHKRONJAT E VOGLA: Përqendroheni lehtë në detyrat e juaja, por jeni shumë të turpshëm.
SHKRONJAT MESATARE: Përshtateni me situatat dhe nuk jeni imponues.
Forma e shkronjave
SHKRONJAT E RRUMBULLAKËTA: Ju mundoheni që të shmangni konfliktet dhe mundoheni që t’i kënaqni të tjerët.
SHKRONJAT E MPREHTA: Ju pëlqen që të mësoni gjëra të reja dhe jeni gjithmonë të gatshëm për sfida të reja. Sa më të mprehta që të jenë shkronjat, aq më ambicioz është personi që i shkruan ato.
Shkronjat e shtypit apo të shkrimit
SHKRONJAT E SHTYPIT: Në aspektin psikologjik, ato tregojnë se bëhet fjalë për një person që nuk i pëlqen që të tregoj shumë gjëra për veten. Jo rrallë, ndodh që këta persona mbështeten më shpesh tek të tjerët.
KOMBINIMI I SHKRONJAVE TË SHTYPIT DHE TË SHKRIMIT: Ky shkrim tregon se bëhet fjalë për një person që fsheh diçka, përderisa shkrimi plotësisht i palexueshëm tregon se bëhet fjalë për një person që nuk e vret fare mendjen për atë se çka mendojnë të tjerët për të.