Do të mbahet, nuk do të mbahet! Nëse mbahet si do të mbahet? Këto ishin vetëm disa prej dilemave që e rrethuan ceremoninë e sivjetme të Çmimeve Grammy, e cila u mbajt të hënën (15/03/2021) herët në mëngjes sipas kohës sonë.
Gjëja e parë që ra në sy ishte se kjo ceremoni e reflektoi pandeminë e COVID-19 me të cilën është duke u përballur tërë bota. Kështu, kjo ceremoni, falë motit të ngrohtë në Los Angjelos të Kalifornisë u mbajt në një skenë të hapur në ambient të jashtëm ku në prapavijë shiheshin pjesë të qytetit. Po ashtu, mysafirët e pranishëm ishin në përputhje të rreptë me masat anti COVID-19.
Për shikuesit në hapësirat shqiptare, padyshim pjesa më e rëndësishme e kësaj ceremonie sivjet ishte nëse Dua Lipa do të arrinte të fitonte në ndonjërën prej gjashtë kategorive në të cilat ishte e nominuar. Edhe kësaj here Dua nuk na dëshpëroi pasi që ajo u shpërblye me një Grammy për kategorinë e Albumit më të Mirë Pop Vokal (Best Pop Vocal Album). Më këtë fitore Dua e çoi në tre numrin e Çmimeve Grammy të fituara deri tani. Kujtojmë se në vitin 2020 Dua Lipa u shpërblye me dy Grammy: Artistja e Re më e Mirë (Best New Artist) dhe Regjistrimi më i Mirë Dance (Best Dance Recording).
Në fjalimin e saj falënderues me rastin e pranimit të shpërblimit të saj Dua në mes të tjerash theksoi se albumi “Future Nostalgia” ishte tejet domethënës për të pasi që i kishte mësuar asaj sa e rëndësishme është lumturia. Krahas falënderimeve për të gjithë bashkëpunëtorët, familjen dhe miqtë që e kanë përkrahur që kur filloi t’i hidhte hapat e parë në muzikë si 17 vjeçare, një falënderim të veçantë Dua e shprehu për adhuruesit e saj: “Dua që të shpreh një falënderim masiv; masiv për adhuruesit e mi… e tërë kjo është falë jush.”