FYTI I DJALLIT NË UJËVARËN IGUAZÚ

“Fyti i Djallit” – ky është emri frikësues që i është vënë vetëm një pjese të

kompleksit madhështor të Ujëvarave Iguazu. Megjithatë, duhet theksuar, që ky emër është më se i merituar pasi që në këtë pjesë, ky kanion e përpin gjysmën e ujit vetëm për ta nxjerrë atë jashtë në formën e një shkume djallëzore.

Ujëvarat mahnitëse Iguazu janë shpallur si një prej ‘7 Mrekullive të Reja të Natyrës’ dhe ato janë pjesë e kufirit dramatik në mes të Argjentinës dhe Brazilit. Në anën e Argjentinës, është ngritur një platformë vrojtimi nga ku vizitorët kanë qasje në një pamje panoramike të ujëvarave. Ndërsa në anën e Brazilit, shtegu të çon në fundin e tërë kanionit.

Burimi i këtyre kaskadave madhështore është lumi Iguazu, i cili gjarpëron nëpër Brazilin Jugor, përpara se të fillojë të bjerë në mënyrë marramendëse në Rrafshnaltën e Paranasë. Parqet kombëtare në këtë zonë, si në Brazil edhe në Argjentinë, i mbrojnë rreth 2330 kilometra katrorë të natyrës së paprekur, ndonëse jo tërësisht të heshtur.