ISHUJT KOH HONG: NJË PARAJSË TROPIKALE NË GJIRIN PHANG NGA

Në ujërat e kaltra të Gjirit ‘Phang Nga’ në Tajlandë gjendet një xhevahir i fshehtë, i cili i mahnit vizitorët me bukurinë e paprekur. Ishujt Koh Hong, me shkëmbinjtë gëlqeror të mrekullueshëm, ujërat e kthjellëta, dhe gjelbërimin e dendur, e ofrojnë një parajsë tropikale të pashoqe.

Me të arritur në ishujt Koh Hong do të magjepseni nga atraksioni i tyre kryesor, që me shumë të drejtë njihet me emrin “Dhoma me Pamje”. Kjo lagunë mahnitëse, e rrethuar nga shkëmbinjtë e lartë mund të arrihet vetëm përmes një të çare të ngushtë gjatë zbaticës. Me të hyrë në këtë mrekulli të natyrës të krijohet ndjenja e hyrjes në një strehimore të fshehtë. Rrjedhimisht, kjo lagunë është vendi i përsosur për t’u freskuar duke bërë not apo thjesht duke e shijuar dhe përthithur qetësinë që ju rrethon.

Krahas kësaj lagune pyjet e dendura tropikale mbi këta ishuj gëlqeror bashkë me plazhet ngjyrë argjendi e bëjnë grupin e ishujve Koh Hong një parajsë të pashoqe dhe një destinacion turistik të jashtëzakonshëm.