Kohëve të fundit përmes postimeve në llogarinë e tyre në Facebook, Qendra për Informim dhe Përmirësim Social (QIPS) ka bërë të ditur se e ka aktivizuar Linjën e Jetës. Përmes kësaj linje synohet që të ndihmohet në parandalimin e vetëvrasjeve duke iu ofruar mbështetje në distancë të gjithë atyre që thërrasin në numrin 0800 12345.
Linja e Jetës është një qendër telefonike për parandalimin e vetëvrasjes dhe të gjitha thirrjet e pranuara janë tërësisht anonime. Përndryshe, thirrjet pranohen nga vullnetarët e qendrës çdo ditë nga ora 18:00 në mbrëmje deri në orën 02:00 të mëngjesit.
Këtu për ty; Nuk ke pse ta përballosh vetë, Komunikimi mund të ndryshojë jetën tënde; Ti nuk je vetëm, janë vetëm disa prej porosive që iu drejtohen të gjithë atyre që janë duke u përballur me mendime për vetëvrasje, të cilëve po ashtu, iu bëhet thirrje që të thërrasin falas në numrin e Linjës së Jetës 0800 12345.
