Të gjithë ata që janë bërë pjesë e “chatbot-it” interaktiv, i cili është lansuar nga Organizata Botërore e Shëndetësisë (OBSH) në bashkëpunim me aplikacionin Viber Rakuten, sot e kanë pranuar një mesazh të titulluar: ‘One World: Together at Home.’
Më tej në këtë mesazh thuhet: ‘One World: #Together at Home.’ Është një transmetim historik, global në mbështetje të punëtorëve shëndetësorë dhe OBSH-së në luftën kundër pandemisë COVID-19.
ÇKA ËSHTË: ‘ONE WORLD: TOGETHER AT HOME.’?
Ky do të jetë një koncert nga shtëpia në të cilin do të marrin pjesë dhjetëra personalitete të famshme dhe muzikantë, kurse nikoqirët ose moderatorët e tij do të jenë: Jimmy Fallon, Jimmy Kimmel dhe Stephen Colbert.
Ky aktivitet është bashkëpunim në mes të OBSH-së dhe Global Citizen, dhe ai ka për synim që të nxisë njerëzit që të veprojnë kundër përhapjes së korona virusit, duke qëndruar në shtëpi. Organizimin e këtij aktiviteti e ka ndihmuar edhe Lady Gaga.
KUSH DO TË MERR PJESË?
Të gjithë: nga Usher deri te Taylor Swift, te Rolling Stones dhe Lady Gaga, e deri te Oprah Winfrey. Edhe Bill dhe Melinda Gates janë paraparë që të paraqiten. Lista e plotë e të gjithë pjesëmarrësve mund të gjendet në faqen e këtij aktiviteti dhe duhet t’ju themi se është një grup i jashtëzakonshëm. Adresa është: (https://www.globalcitizen.org/en/connect/togetherathome/).
SI MUND TA SHIKOJ?
Ka disa mënyra se si mund ta shikoni.
Aktiviteti do të zgjasë plot tetë orë dhe ai është i ndarë në dy pjesë.
Pjesa e parë është një para koncert prej gjashtë orësh i cili do të fillojë të transmetohet sot (të shtunën) në mbrëmje nga ora 20:00 përmes: “Live Stream” Amazon Prime Video, Facebook, Instagram, TuneIn, Twitch, Twitter dhe YouTube. Kurse në mëngjesin e së dielës nga ora 02:00-04:00 do të fillojë pjesa kryesore e koncertit e cila do të zgjasë dy orë. Kjo pjesë e aktivitetit do të transmetohet edhe nga Apple, Music, Apple TV, dhe Apple Beats 1 si dhe kanalet televizive amerikane ET, NBC, CBS dhe ABC. Kurse të dielën në mbrëmje kanali televiziv BBC One do të transmetojë një përmbledhje të tërë programit.